ഗദ്ദാമ

പട്ടാമ്പിക്കടുത്തുള്ള ഒരു ഗ്രാമത്തിൽ നിന്നും സൗദി അറേബ്യയിലെ ഒരു വീട്ടിൽ വേലക്കാരിയായി (ഗദ്ദാമ) വരുന്ന പെൺകുട്ടിയാണു അശ്വതി (കാവ്യ മാധവൻ). അവളുടെ ഭർത്താവ് രാധാകൃഷ്ണൻ (ബിജു മേനോൻ) വിദേശത്ത് ജോലി കിട്ടി പോകാൻ തയ്യാറെടുക്കുമ്പോഴാണു മുങ്ങി മരിക്കാൻ പോകുന്ന കുട്ടികളെ രക്ഷിക്കാനുള്ള ശ്രമത്തിൽ മരണപ്പെട്ടത്. രാധാകൃഷ്ണനു ജോലി തയ്യാറാക്കി കൊടുക്കാമെന്നേറ്റിരുന്ന ഉസ്മാൻ (സുരാജ്) തന്നെയാണു അശ്വതിക്കും ജോലി ശരിയാക്കി കൊടുക്കുന്നത്. ഉസ്മാൻ ഡ്രൈവറായി ജോലി ചെയ്യുന്ന വീട്ടിൽ തന്നെയാണു അശ്വതിക്കും ജോലി. വീട്ടുകാരിൽ നിന്നുമേൽക്കുന്ന ക്രൂരമായ പീഡനങ്ങളിൽ അശ്വതിക്ക സഹായമാകുന്നത് അവിടത്തെ മറ്റൊരു വേലക്കാരിയായ ഇന്തോനേഷ്യക്കാരി ഫാത്തിമയാണു (അബ്ബി ഗൈൽ). പക്ഷേ, ഫാത്തിമയുമായുള്ള അവിഹിത ബന്ധം കണ്ടുപിടിക്കപ്പെടുന്നതോടെ ഉസ്മാൻ അവിടെ നിന്നും പുറത്താക്കപ്പെടുന്നു. അശ്വതിയുടെ സഹായത്തോടെ ഫാത്തിമ അവിടെ നിന്നും ഉസ്മാന്റെ അടുത്തേക്ക് ഓടിപോകുന്നു. ഇതിനെ തുടർന്നു അശ്വതിക്കു ക്രൂരമായ മർദ്ദനമേൽക്കേണ്ടീ വന്നു. അവളും ഉസ്മാന്റെ സഹായത്തോടെ അവിടെ നിന്നും രക്ഷപ്പെട്ട് റിയാദിലേക്ക് പോകാൻ ശ്രമിക്കുന്നെങ്കിലും ഉസ്മാന്റെ അടുത്തെത്താൻ സാധിക്കുന്നില്ല.

മരുഭുമിയിൽ അഭയം തേടി അലയുന്ന അവളെ ആട്ടിടയനായ ബഷീറും (ഷൈൻ ടോം ചാക്കോ) ഡ്രൈവറായ ഭരതനും (മുരളി ഗോപി) ചേർന്നു രക്ഷപ്പെടുത്തുന്നു. ഭരതൻ തന്റെ വണ്ടിയിൽ അശ്വതിയെ ഉസ്മാന്റെ അടുത്തെത്തിക്കുന്നെങ്കിലും മോഷണം നടത്തിയതിനു ശേഷം വേലക്കാരി രക്ഷപ്പെട്ടെന്ന വാർത്ത പത്രങ്ങളിൽ കണ്ടതിനെ തുടർന്നു അവളെ സഹായിക്കാൻ തയ്യാറാകുന്നില്ല. മറ്റൊരു ആശ്രയവുമില്ലാതാകുന്ന അശ്വതിയെ ഭരതൻ തന്റെ വീട്ടിൽ രഹസ്യമയി പാർപ്പിക്കുന്നു.

ഇതിനിടെ മലയാളിയായ വേലക്കാരിയെ കാണ്മാനില്ലെന്ന വാർത്ത കണ്ടൂ അതിനെ കുറിച്ച് സാമൂഹ്യപ്രവർത്തകൻ കൂടിയായ റസ്സാഖ് (ശ്രീനിവാസൻ) അന്ന്വേഷിക്കുന്നു. ഉസ്മാനെ കണ്ടെത്തുന്ന അവരോട് അയാൾ ആദ്യമൊന്നും അറിയില്ലെന്നു പറയുന്നെങ്കിലും പിന്നീട് കുറ്റബോധം തോന്നി തന്റെടുത്തു വന്നെങ്കിലും പറഞ്ഞയക്കുകയാണുണ്ടായതെന്ന് അറിയിക്കുന്നു.