പൂമരപ്പൊത്തിലെ താമരക്കുരുവീ

ഓ....ആ...ആഹാഹാ..
പൂമരപ്പൊത്തിലെ താമരക്കുരുവീ
രാമപ്പഴം പഴുത്തൂ - വനങ്ങളിൽ
സീതപ്പഴം പഴുത്തൂ
മാടിവിളിക്കുന്നു മാന്തളിർ കൈയ്യുകൾ
ഓടി വാ - ഓടി വാ ഓടി വാ
പഴം തിന്നാൻ - പഴം തിന്നാൻ
(പൂമര...)

ഞാനറിയാതെന്റെ പൂങ്കിനാവിന്നലെ
മാനത്തെക്കണ്ടത്തിൽ തിന വിതച്ചൂ
ഓണപ്പുലരിയിൽ തിന വിളഞ്ഞൂ
ഓടി വാ - ഓടി വാ ഓടി വാ
തിന തിന്നാൻ - തിന തിന്നാൻ
(പൂമര...)

തെന്മലവാരത്തിൽ പൊന്മുകിൽത്തോട്ടത്തിൽ
പുന്ന പൂത്തു പിന്നെ പുളി വിളഞ്ഞു
താമസിച്ചുണർന്നൊരു പൊൻകുരുവീ
താഴോട്ടിറങ്ങി വാ - താഴോട്ടിറങ്ങി വാ
പുളി നുണയാൻ - പുളി നുണയാൻ
(പൂമര...)